打一場幾千元的籃球

男人在街場打籃球時被人偷了iphone4，那情節可以拍成《警訊》。

張相一萬個唔關事，場係元朗橫洲，射波者為余文樂，搵相時見到，借來一用充下場面。

時間：下午
人物：一堆少年，一個不似賊的賊
地點：籃球街場

（幾名少年去到籃球場，放低袋，坐在一邊準備打波的時候，突然有個九唔搭八的人出現，和眾人扮熟。）
賊：「打波呀？」
少年A：「係呀。」
賊：「平時好少見你哋嚟呢個場玩喎。」
少年B：「因為我哋打開個場維修緊，咪過嚟呢度試下囉。」
賊：「e，你哋好似有電話響喎！」
（眾少年拿出電話。）
少年A：「係咩？」
少年B：「唔係我。係咪你呀？」
少年C：「都冇喎！」
（此時賊人仔細觀察眾人電話，鎖定偷竊目標。）
（少年發現不是自己電話響，於是把它放回袋中。）
（賊人與少年吹水，借此博取好感，又將自己的袋放到他們的袋旁邊，方便行事。）
賊：「快啲出去打波啦，一陣又有人嚟霸場架啦！」
（賊人盡力落咀頭令他們離開。）
（眾少年打波。）
（見沒有人為意，賊人在少年A袋中拿走電話，然後飛快地離開。）
（眾少年打完波，走到自己的袋旁邊，少年C在喝水，少年B在抹汗，少年A在找電話。）
少年C：「好肚餓，去食嘢啦。」
少年B：「好呀！」
少年A：（在袋裡翻來覆去）「我個電話唔見咗呀！」
少年C：「唔係呀嘛？你搵啲清楚先啦！」
少年B：「你擺咗喺邊架？」
（眾人七嘴八舌，聲漸細）
（主持Philip及西九重案組黃sir步入鏡頭）
主持：「扒手其實無處不在，佢哋最鍾意喺你唔為意嘅時候落手。好似頭先個case咁，班後生仔掛住打波，冇理會自己嘅財物，所以就俾賊人有機可乘。係呢黃sir，呢類球場偷竊案，近年有冇上升趨勢？」
黃：「Philip，呢類個案數字，近年都有上升嘅趨勢，就以西九龍為例，平均每月都有20至30宗。」
主持：「其實市民有咩辦法可以避免喺球場俾賊人偷嘢呢？」
黃：「正所謂財不可以露眼，各位去打波嘅市民最好著得有咁寒酸得咁寒酸，以免俾賊人睇中。第二，如果遇到有陌生人話你電話響，跌咗錢之類，記得要小心，可能係賊人用來試探你哋財物位置嘅方法。第三，一定要使用球場locker，如果係街場，請市民輪住打波或者帶埋女朋友、屋企人去睇住財物。如果一個人去，最好咩都唔好帶，帶張八達通同身分證就夠啦。」
主持：「唔該晒黃sir！大家記得要睇實自己嘅財物勒。接住落嚟，我哋有一宗失蹤案，希望各位市民可以提供線索。」

數字是假的，但賊人的手法卻千真萬確。
如果我寄去警訊，到底他們會不會幫我拍？希望會由mingming同jimjim演出啦！！
以下呢條片得mingming，嗯...都幾好笑。

呢條《美人計》真係睇幾多次笑幾多次，到底點解會咁？係咪因為冇女演員？